An sanar da ranar wasan Real da Getafe a La Liga

Mahukuntan La Liga sun bayyana ranar da Real Madrid za ta karbi bakuncin Getafe a karawar mako na 34 a kakar bana.

Getafe za ta ziyarci Santiago Bernabeu, domin kece raini da Real Madrid ranar Asabar 13 ga watan Mayu.

Kafin nan Real Madrid za ta buga wasa biyu a La Liga da karawar karshe a Copa del Rey da karbar bakuncin Manchester City a Champions League.

Jerin wasan Real Madrid kafin ta fuskanci Getafe

La Liga ranar Asabar 29 ga watan Afirilu

Real Madrid da Almeria

La Liga ranar Talata 2 ga watan Mayu

Sociedad da Real Madrid

Copa del Rey Asabar 6 ga watan Mayu

Real Madrid da Osasuna

Champions League Talata 9 ga watan Mayu

Real Madrid da Man City

Real ta doke Getafe 1-0 a wasan farko a bana ranar 8 ga watan Oktoban 2022, Eder Militao ne ya ci kwallon minti uku da take leda.

Ranar Talata 25 ga watan Afirilu, Real Madrid ta doke Celta Vigo 4-2 a karawar mako na 31 a babbar gasar tamaula ta Sifaniya ta kakar nan.

Barcelona ce ke jan ragamar teburin La Liga da maki 76, sai Real Madrid ta biyu mai maki 65.

Getafe mai maki 31 tana ta 17 a kasan teburin La Liga, bayan wasa 31.

Read full article