BBC Hausa of Monday, 16 August 2021
Source: BBC
Dan wasan Chelsea, Tammy Abraham ya je Italiya ranar Lahadi a shirin da yake na komawa Roma da taka leda kan fam miliyan 34.
Wakilan dan wasan tawagar Ingila sun cimma yarjejeniya tsakanin kungiyoyin biyu a karshen mako.
Ranar Lahadi Chelsea ta kammala cinikin Romelu Lukaku daga Inter Milan kan fam miliyan 97.5.
Shine dan wasan da ta dauka mafi tsada a tarihi, kuma na biyu da aka saya da kudi mai tsoka a Burtaniya, bayan Jack Grealish daga Aston Villa.
Manchester City ce ta dauki Grealish dan kwallon tawagar Ingila kan fam miliyan 100 a bana a matakin wanda aka saya mafi tsada a Burtaniya kuma na tara a duniya.
Idan Abraham ya taka rawar gani a Roma, cinikin zai kai fam miliyan 68 nan gaba.
Amma hakan ba zai yiwuba har sai bayan kaka biyu idan ya taka rawar gani a kungiyar da Jose Mourinho ke jan ragama.