Liverpool za ta ɗauki Mac Allister kan fam miliyan 55

Dan wasan Brighton, Alexis Mac Allister na daf da komawa Liverpool kan fam miliyan 55, bayan da ƙungiyarsa ta amince ya je a gwada koshin lafiyarsa.

Dan ƙasar Argentinan, shi ne ƙashin bayan Brighton, wadda ta yi ta shida a Premier League a kakar nan.

Mai shekara 24, ya bayar da gudunmuwar da Argentina ta lashe kofin duniya a Qatar a cikin Disambar 2022.

Liverpool na fatan ƙara karfin ƙungiyar, musammam gurbin masu buga tsakiya, bayan da James Milner da Naby Keita da kuma Alex Oxlade-Chamberlain za su bar Anfield a karshen watan Yuni.

Mac Allister ya taka rawar gani da Brighton ta samu gurbin buga gasar zakarun Turai a badi ta Europa League a karon farko a tarihin ƙungiyar na shekara 122.

Ya buga wasa 40 da cin kwallo 12, yawancin a gurbin lamba 10 a fili, wasu lokutan ya kan zama tsani tsakanin masu tsaron baya da masu cin kwallaye.

Mac Allister ya koma Brighton daga ƙungiyar Argentinos Juniors a Janairun 2019, daga nan aka bayar da aronsa a ƙungiyar ta Buenos Aires.

Ya fara yi wa Brighton wasa a karawar da ta tashi ba ci da Wolverhampton Wanderers a Maris din 2020 - kawo yanzu ya yi wasa 112 da cin kwallo 20 a ƙungiyar.

Mac Allister ya buga wa tawagar Argentina wasa 16, ya kuma yi wasa shida a gasar kofin duniya da Argentina ta lashe kofin a 2022.

Ya kuma ci kwallo a wasan da Argentina ta ci Poland a fafatawar cikin rukuni a wasannin da Qatar ta karbi baƙunci.