Marcus Rashford: Dan kwallon Manchester United zai yi jinyar wata uku

Dan kwallon Manchester United Marcus Rashford zai yi jinyar watanni uku saboda za a yi masa tiyata a kafadarsa a mako mai zuwa.

Dan shekaru 23 din ya dade yana fama da matsala a kafadarsa kuma ana ganin cewa tiyata ce mafita ga matsalar.

Da farko United na jan kafa amma yanzu sun amince a yi wa dan kwallon tiyata.

Rashford ya zura kwallo 11 cikin wasanni 37 a gasar firemiyar kakar wasan da ta wuce kuma yana cikin tawagar Ingila a gasar Euro 2020.

"Bayan tattaunawa tsakanin Marcus da Ole Gunnar Solskjaer da kuma likitocinmu, mun yanke shawarar za a yi masa tiyata ba tare da bata lokaci ba," in ji sanarwar da kungiyar ta fitar.

Rashford ya taimakawa United ta kammala a matsayin kungiyar ta biyu a gasar Firemiyar kakar wasan da ta wuce inda Manchester City ta lashe kofin.